Box
Poesie e altro da inserire. Basta che siano vostre.
Inviate a info@venessia.com
<< INDIETRO
SIOR ANTONIO RIOBA
Renato Coller
(tratto da: Toni Buriòndolo & Soci)
Muso filà, ‘na suca
de marmo per barèta.
La borsa de la grana
sora el brasso
da bon mercante
el se tien da conto.
La velada ghe russa per tèra
tagiada da un sartor de pière.
Sior Antonio Rioba, incantonà
el tien de òcio
campo, fondamenta e gati
e ‘l pindolo che ‘riva
tirà da qualche pandòlo.
Na volta i ga mirà
sul naso, adesso,
el ghe n’a uno de fero.
La costansa lo ga ‘bituà
che manco co la piova ‘l se ritira,
restando all’erta.
E quando qualche mamo,
o tùmbano che fusse, un corbatèlo
portasse al so inderisso,
stando serio ‘l se sfondària dal rider.
DA VENESSIA E A SO LAGUNA » « DEPUIS VENISE ET SA LAGUNE
[Claudio Boaretto]
Xe zà deboto do ani, Voici déjà bientôt deux ans,
Che, sensa rimpianti e sensa rancori, Que, sans regrets et sans rancunes,
Da una vogia de cambiar, En un élan dépaysant,
Gerimo retornai in Laguna, Nous repartîmes en Lagune,
Col mar in fondo ai oci, Avec la mer au fond des yeux,
Sule isole dei nostri antenati, Sur les îles de nos ancêtres,
Verso le seche dei nostri veci, Vers les hauts-fonds de nos aïeux,
Dove se incrosa un mucio de canali. Où tant de chenaux s’enchevêtrent.
Vogando al ritmo dele stagion, Voguant au rythme des saisons,
Drio del vento e dele maree, Selon le vent et les marées,
Ai orizonti maritimi, Aux maritimes horizons,
E nostre barche se gà ormegià. Nos barques se sont amarrées.
Drio le rive piene de sol, Le long des quais ensoleillés,
i nostri destini va su e zò come le onde, Nos destins vaguent et divaguent,
Sempre pronti par salpar Toujours prompts pour appareiller
Par campi de onde che te incanta. Aux envoutants terrains de vagues.
Dala Venessia de na volta, De la Venise de jadis,
Dai so lidi aluvionari, De ses lidos alluvionnaires,
Ve mandemo par el domila e diese Nous vous mandons pour deux mil dix
i nostri auguri più lagunari. Tous nos vœux les plus lagunaires.
CHE PECA’……VENESSIA……..EL PROGRESSO
[Giorgio Bon]
SAN MARCO – RIALTO – SAN GIORGIO - VISTI IN GUIDA O CARTOINA
PAR CHE A VENESSIA SIA RESTA’ TUTO COME PRIMA
MA SE TI VA A FAR UN GIRO PAR LA CITA’
TI TE ACORSI CHE TUTO XE CAMBIA’
CHE PECA’
NO VEDER PIU’ IN CAE E NEI CAMPIEI
CORRER E ZOGAR NUVOE DE PUTEI
QUATTRO CANTONI – E SCONTE – LIBERA DON DON
EL TACO – I CIMBANI – EL CAMPANON
COL PROGRESSO
SERAI’ IN CASA - VARDAI OGNI MOMENTO
PAR PAURA DEA DROGA O RAPIMENTO
PLAI STESSION – INTERNET – ZOGHI IN TELEVISION
MESSAGGI – FOTO - FILM D’ANIMASSION
CHE PECA’
NO VEDER PIU’ E VECIE OSTARIE
AL BOMBA – LA FRASCA - ALE BECARIE
CO IN FILA SUL BANCO PIATTI DE CICHETI
MEZO VOVO – SPIENZA - O SPIEDIN DE GAMBARETI
TUTO GUSTA’ - CO CALMA VENESSIANA – SENSA FRETA
E BEVER UN SPRIS COL BITTER O LA CLASSICA OMBRETA.
COL PROGRESSO
CAMBIA’ GA EL NOME LA XE ENOTECA
OSTARIA CO L’ACCA – FAST FUD - PANINOTECA
L’OMBRA NEL BALON – EL PROSECCO IN FLUT
TUTTO XE DOC DAL MERLOT AL SPUMANTE BRUT
E - I AVENTORI COL BEVARON IN MAN - SUL PONTE SENTAI
CO LA SPERANZA DA CHI PASSA ESSER VARDAI
CHE PECA’
ANDAR A SPASSO PAR E MERCERIE E NO TROVAR E BOTEGHE GHE GHE GERA
MARFORIO – PETTINELI I DISCHI DE BARERA
CO E VETRINE BEN CURAE E ACATIVANTI
DA INVITAR A COMPRAR TUTI I PASSANTI.
COL PROGRESSO
TUTTA ROBA DE MARCA FIRMADA DA STILISTI
CAPI GRIFFAI – MODEI STRANI – ROBA PAR TURISTI
INDOSSO A MANICHINI DURI IMPALAI
CON VISI BIANCHI DA PARER MALAI
PAR NO PARLAR DEI PRESSI – UN’ESAGERASSION
SOLO A VARDARLI TI VA IN FIBRILASSION
CHE PECA’
NO VEDER IN GIRO PAR I CANAI
IN SANDOLO BURANEO I VIGILI COMUNAI
ATTENTI E PRONTI CO NA’ MULTA PUNIR
CHI SBATEVA DAL BALCON LA STRASSA DA FURBIR
O SVELTI SVELTI CORERGHE DRIO
A CHI DA UN PONTE SE GA BUTA’ IN CAORIO
COL PROGRESSO
TUTI IN UFICIO - DARENTE AL MONITOR SENTAI
ATENTI A QUEL CHE SUCEDE IN CAMPI E CAI
MA SE IN STRADA UNO STA MAL O VOL UN’INFORMASSION
NO TI GHE NE TROVI UNO DA SAN PIERO A LA STASSION
CHE PECA’
EL MERCA’ DE RIALTO - PIEN DE VERDURE E FRUTTA VARIA
CO NARANSE E MANDARINI A PROFUMAR L’ARIA
PIRAMIDI DE POMI –SUCHETE E MELANZANE
FONDI DE ARTICIOCHI – CASCHI DE BANANE
COL PROGRESSO
SPECIALITA’ VENESSIANE MODEI ORIGINAI
MA VARDANDO BEN DAPARTUTO UGUAI
MASCARE FATTE IN CINA – GONDOLETE STRANE
CO CARILON CHE SONA CANSON NAPOLETANE.
NOSTALGIA – RIMPIANTI – NO SOLO CONSTATASSION
PAR NA’ CITA’ CON SIMILE STRUTURA - NATA PAR VOLONTA’ DE LA NATURA
OGNI MODERNITA’ XE ‘NA BRUTURA.
COME - PAR SEGUIR LA MODA CHE NE CIRCONDA
FARGHE E LABRA AL SILICON AL SORISO DE LA GIOCONDA!!!
Venezia
[Simonluca Bortolozzo]
LA MIA CITTA' E' UN PESCE DI PIETRA
MORTO E DISTESO SOPRA UN TAPPETO DI STUZZICADENTI
CHE UNA VOLTA ERANO UN BOSCO
LA MIA CITTA' E' UN LABIRINTO DI PIETRA
SENZA ENTRATA E SENZA USCITA
PERO' IL BIGLIETTO LO PAGHI LO STESSO
LA MIA CITTA' E' UN'ISOLA CHE VUOLE SCAPPARE
UNA SIRENA CHE NUOTA IN ACQUE CONTAMINATE
DOVRA' ROMPERE IL CORDONE OMBELLICALE
LA MIA CITTA' E' UNA VECCHIA CHE NON HA PIU' LA FORZA DI LAMENTARSI
INVASA DA MILIONI DI FORMICHE
CHE PAGANO PER VEDERE LA SUA LENTA AGONIA
LA MIA CITTA' E' UN MUSEO SENZA SOFFITTO
APRE LA MATTINA E CHIUDE LA SERA
PERO' QUALCUNO RESTA DENTRO
LA MIA CITTA' E' UNA PUTTANA
OGNI GIORNO VENDUTA E STUPRATA SI METTE IN POSA
FOTOGRAFA ANCHE TU LE SUE FERITE
LA MIA CITTA' NON E'LA MIA CITTA'
ODIA ANCHE ME
CHE NON HO SAPUTO AIUTARLA
Mòmolo e Càte
[Gianni Vivian]
I gèra tuti do veneziani biòti
lu de santa Marta e ela da Castèlo...
Lu belo in candèla, no tanto alto ma
co i cavèi rizzolèti, un per de mustacèti
senpre curài, vestìo in cìcara e neto cofà
'na bula, la bagolìna, el capèlo de pàgia,
ogni tanto el vegnìva co la chitàra gratàndo
le corde e un pochèto de vose el asenàva
a le "quaranta canzonète"...
Ela gera 'na squìncia senpre co le ganàsse
piene de sbelèto, i cavèi pontài co un cocognèlo:
- Chi bela vol parèr la pele de la testa
ghe ga da dolèr...
Drento 'na veladìna ciuciàda, scanàda, ingogiàda
che ghe tiràva al peto e el culo, un sìdio de fèmena
senpre co la boca 'vèrta par criticàr e straparlàr de
tuti, de belo la gavèva do oci slusènti cofà un balàsso...
- Vorrei baciàr i tuoi capelli neri, gli occhi tuoi sinceri...
a fàrghe tute le bele belìne, a gondolàrla a dìrghe parole
piene de Amor:
- Vu si le baìse de'l mio cuor...
Le so amìghe invidiòse a dìrghe che la gavèva trovà la
bàla d'oro ma dopo i confèti vien fora i difèti...
El fassèva el pitòr co 'na ànda che no te dìgo a bel belo che nissùn ghe corèva drìo co i bèzzi che no rivàva e no stropàva,
tuto fato a la babalà, a 'rivàr cico cico a la fine de la setimàna
par po' dopo mandàr li àbiti a studiàr, do penelàe, do ònbre,
gèra più el tenpo passà al bàcaro che ranpegà su par la scàla
co la penelèssa...
-Desgrassìa vien casa...buèlo marso...dàme i schei par far la spesa...
Dai Cate...fèrmite...magna calcòssa...
Drio la stràda gera tuto un tarocàr, un criàr...
-Maledèta quèla volta...ah, se gavèsse 'scoltà mia mare...
Po' dopo in leto i tornàva a far la pase...
-Te zùro che domàn cànbio...
ma domàn gera la stessa sòlfa...sìcut era...e intànto la pànza
cressèva...cressèva...ogni ano 'na creatùra 'nosènte come che la fusse stàda 'na cunìa...
Me so insognà
[Gianni Vivian]
Me intabaràvo ne'l garbìn
e de lusariòle slusènti un fiantìn,
ne l'oro fiamànte de'l formentòn
par pituràrme tuto de emossiòn...
Co 'ste perle de bròsa e aguàzzo
'na longa colàna interzàda me fàsso,
me càvo scarpa e anca el calzèto
e su la spagna a pie nui me meto
po' dopo, cussì tuto d'un tràto
me mèto a cantàr e sìgo da màto
tuto 'sto morbin che ' dòsso se méte
spàsema sitòni, pavège e seleghète
i làvri sporchi e la canotièra strapàda
par tuti quei graspi de ùa robàda,
le man, i cavèi e parfìn su l'òcio
pièn de sginzi de fàngo e de pòcio,
cìcare, vandòti, gorne che baraònda
co tuti quei cògoli tirài co la fiònda...
Zè stà cussì dolse, cussì caro e belo
me so insognà che gero tornà putèo...
Esodo
[Gianni Vivian]
Adìo
fenèstra inpissàda su'l rio
co i pitèri de geràni e de basegò,
adìo canpièlo co la vera de'l pozzo
tuta lustra e consumàda, la salizàda
dove che se zogàva el canpanòn...
Adìo
altàne dove che sventolàva ninziòli cofà
bandière co le rose ranpegànti e i feralèti
adìo
portòni dove che drènto se se dàva i prìmi
bàsi, se se zuràva eterno Amòr...
Adìo
colònbi sprotòni e miseròni col vostro tugàr
co i vostri svòli de nòzze...
Adìo
traghèto co la gòndola pièna de fèmene e de
spòrte, el bràzzo gagiàrdo de'l gondolièr,
la scàtola de làta dove che sonàva 'na palànca...
Adìo
san Micièl 'desso cari i me veci restarè soli
ma inmànco dormirè 'ncòra ne'l bonìgolo
de la lagùna...
El bùrcio a mutòr zé càrgo de massarìe,
so incantonà in t'un cantòn, stòrno, inbaucà,
me par de vivèr in t'un sogno e invèsse i zé drio
scortegàrme l'ànema, tochi de pele che resta
tacài a 'ste pière strigàe, colpi de manèra che spàca
la me vècia piànta e che mete a nùo le me raìse par sènpre...
Li òci zé suti, gnànca 'na làgrema, drento so svòdo
cofà un scòrzo de garùsolo...
Sèmo 'rivài al Tronchèto, ancùo Mestre sarò da ti,
no 'spetàrte che te vògia un fià de ben, ti lo sa che
el me cuor, le me vìssare zé restàe dove che pière
e aqua zé 'na sola carne:
Adìo
Venezia, adìo mare mia...
Dona inamoràda
[Gianni Vivian]
Se ti càpiti e Venèzia
no stà crèder de èsser 'rivà a Disnilànd
o ne'l paèse de le monàe parché quando
che ti la vedi par la prima volta te ti inamòri
cussì de colpo cofà el fusse el to primo Amòr,
come che la fusse 'na to conpàgna de scuòla...
Fursi ti credèvi che i so abitànti fusse anfìbi,
meze rane e mezi òmeni, o mezi cocài e mezi crestiàni,
fursi i più veci ga subìo de le metamòrfosi e mutassiòn
co'l passàr de'l Tenpo cussì se ti vedi qualche vecio
che va a voga sforzàda su e zo par i ponti sertamente
no zé parché el ga le pìne ai pìe ma zé parché no'l
ghe la fa più a ranpegàrse...
Vògighe ben a 'sta sità
ma quando che se vol ben se asetà l'altra metà co tuti
i so prègi co tuti i so difèti, difèti che vien fora dopo
i confèti, Venezia zé 'lòra come to mama, i tui de casa,
el to paese, la to patria, la to bandiera, donca ti la devi vardàr
co li òci de l'Amor, asetàrla co'l sol, la piòva, el calìgo,
l'aqua alta, quando che la zé 'pèna svègia, senza trùco,
co le scoàsse che galègia, in quèle zornàe quando che la
zé tuta in grìngola co le fazzàde de i palàzzi che par
de merlèto, quando che el calìgo fisso fisso la veste
de tul robàndoghe tute le so fatèzze, quando che i vaporèti
no sìrcola o i fa siòparo e ti te toca 'ndàr tòrzio su 'ste
pière slìmeghe, quando che l'aqua alta la violènta senza
remissiòn, covèrze tuto squàsi la volèsse negàr e ela
zé là, ofèsa, indifèsa, pòvara gràma, sbandonàda co quel
udòr da freschìn che fa moto de stòmego, co le bòzze
de prastica che fa bòvolo, co queli turìsti desgrassiài
che se divèrte a caminàr a pìe nui, a fotografàrla ne la
so angonìa e senza nissùna pietà...
Ma ti continua senpre a volèrghe ben
par tuto quel grando Amor che la te dà, no stà tratàrla
co conpassiòn, co suficènza, superiorità e destàco,
co desprèssio anca se so fiòi ingrati te la buta tra i bràzzi
come la fusse 'na consumàda putàna vestìa de false zòge
de gòndole de pràstica co de le lucète che fa da piànzer
e màscare co la musàna da Pierò co quèla falsa làgrema,
tiènte in mente che ela la zé senpre quela gran Regina,
quèla dama degnitòsa de antìghi sprendòri quando che
el so liòn de san Marco ruzàva e dava de quele zatàe che
metìva ne la pòlvare tute le altre bandière, làssa star i specèti
par le lòdole, quel turismo mòrsega e scànpa, quèli foresti
che se porta via tuto da càsa, che i magna i panìni sora
i monumenti e i buta carte oleate e latine par tera...FERMITE,
ciàpa a caso 'na cale, un sotopòrtego, un canpièlo, un pònte,
no stà 'vèr nissùna prèssa, no stà còrer, stùa el telefonìn,
bùta via i catìvi pensièri e le preocupassìon de'l momento,
l'dio e el prezudìssio e va'...va'...
Colònbi inponarài, gati che se scàlda al sol, vèce sentàe fora
in corte che fa la càlza, putèi che zoga al canpanòn, che salta
sora la vera de'l pozzo, gòndole che se nìnola tacàe a le brìcole
co l'aqua che tònbola su i scalìni vestìi de àleghe de velùdo:
-Pope...Oe...- quel reciàmo inprovìso de'l gondolièr che
desmìssia el rio insonà, va'...va'...e ela te ciàpa par man, la te conpàgna, la se làssa conpagnàr, la te sporze i bràzzi come la fùsse to mama, come che i fùsse ziòghi de inamorài e te par
de sentìrte sbrissàr via, de èsser sòra la giòstra a pelàe, e quèli
sgrìsoli caldi, quel sangue che par che'l bògia...Ogni tanto alza
la testa e scovèrzi altàne, cube, canpanièli, svòli inprovìsi de cocài...
Fèrmite... va drènto par un momento in quela pìcola ostarìa,
inpenìssite le rèce de la vera esènza de 'sto pòpolo, el so parlàr
che par 'na musica, urla e biastème de boche onte e sporche,
inpastàe de ònbre de vin, de quel àntigo avànto de superiorità:
- Ciò canpagnòlo...sèra par un momento li òci e pensa al
Goldoni, a Cesco Baseggio, a Tonìn Michelùzzi, a Wolf Feràri, a le barcaròle...Dimànda quel piàto fredo de pasta
e fasiòli, do sardèle in saòr, i nervèti cònzi, do folpèti, e bagna
el tuto co do ònbre finchè le rèce te deventàra rosse, quando
che i to oci se farà sberlusegànti e picenìni co'l sangue che
scomenzàra a corèr gagiàrdo come cavàlo al troto, 'lòra va
fora a ciapàr 'na bocàda de aria, sèntite su quela banda, sbandònite, vèrzite el colèto e la camìsa e lassa che' garbin
te basa e ti ìnvolza e 'scòlta...'scòlta 'sto gran silènzio fin che te
pararà de sentìr parfìn la so vose...vose de dona inamoràda...
<< INDIETRO
