Indovina la foto misteriosa

Le migliori della settimana

La foto della settimana

Perché Venessia.com

Download

Link


 


 
VENEZIA E' CARA?
Dì la tua...
 
Espressioni dialettali veneziane. Piccola raccolta delle parolacce.

Termini comuni che non si usano più. O quasi.

Modi di dire

Dizionario veneziano-inglese

 

Leggende di ieri

Leggende di oggi

La leggenda del poaro fornareto

 
Poesie, racconti, esperienze veneziane...tutto quello che vi passa per la testa. Inviatemi quello che volete, magari con una vostra foto, e io pubblicherò tutto qui

Ristoranti, pizzerie, locali giusti, bacari, bar... Scrivete i vostri locali preferiti e leggete quello che hanno detto gli altri

 
Le feste di Venessia.com

Una bici per Luigi. Iniziative di Venessia.com.

La seconda bici per Luigi...

Venessian in Australia

 

VènetoRing

Indŕo | Lista dei siti | Stat́steghe | Xóntite | Sito a caxo  | Vanti

 
Veneziani d.o.c.: questi sono i veneziani che a torto o a ragione sono considerati i più invidiati a Venezia. Comunque caratteristici.

I gondolieri

I tassisti

Gli abusivi

Quelli delle bancarelle

Gli intromettitori

Altri veneziani:

I portabagagli

I venditori di
grano per i piccioni

I cantanti delle serenate in gondola

I veneziani comuni

I vigili

Sbarbai

 

Colombi

Gatti

Flora & fauna

 

Lido

Chioggia

Pellestrina

Mestre

Marghera

 

 

Box

Poesie e altro da inserire. Basta che siano vostre
Inviate a info@venessia.com

<< INDIETRO | AVANTI >>

VECIO GONDOLIER
Gianni Vivian

Venezia
le stèle de là sora stanòte e se ga ingolfà
soto aqua, drènto i to canàli,
le gòndole se trova tute maravegiàe
ninàe dolsemente tra la vègia e el sono
par 'na pòlvare fina fina de diamante
che inpìssa come par strighèzzo 'sto presèpio
par che la salizàda sia deventàda de oro
e d'arzento, de vero bufà de Muràn,
le cube de le to cèse pituràe da li ànzoli:

El gondolièr siga -Oe Pope -
ziràndo el cantòn de'l rio de'l Fòntego
de i Todeschi...

Un colònbo ripète el so verso,
el conta de noti strigàe quando che la luna
riveste 'ste pière de 'na lùse mai vista prima
che le strasfòrma in piràmidi de oro, in colòne
de opàl e calcedònio, co'l cavàlo de'l Coleòni
che'l par pestàr e s'ciumàr cofà el vegnìr 'vanti
de la batàgia, e nei grandi silènzi de la luna pièna
par de sentìr el ciaciaràr, l'inalocamènto di li ànzoli
che se ferma a vardàr 'sta creatùra da la belèzza
che contùrba, de 'sta dea senpre pronta a farse
ogni istante
ogni menuto
òpara d'arte
dove che i marmi laorài a strafòro de'l Palàzzo
Ducàl par merlèti, i rii colàne de perle,
canpi, canpièli, sotopòrteghi, càli, zòge incassàe
e ela se làssa 'ndàr cofà dona inamoràda, zé
conquista, posessiòn, fòndita de corpi, sensi
che invòlze e che te rùmega drento,
donassiòn conprèta , Amor che stravòlze,
condissiòn mentàl...

Ne'l splendòr de'l sol vien 'vànti a voga sforzàda
i veci co le so storie de cocàli curiòsi che vegnìva
a far el nìo tra i sogèri, de siègoli arzentài che balàva
zoghi d'Amor 'torno a le brìcole, ai inbarcadèri,
el ritorno de le sèpe che parèva balarìne in tutù,
de l'aqua lànpida tolta sùzo in mezo al Canalàzzo
da bèver par purgàrse, de i vestìti 'scònti tra li scalìni
quando che se 'ndàva a nuàr in rio par paura de la
guàrdia de'l pìsso, quando che i se butàva co s'ciònpe,
spanzàe, caorii, sbrufàde, cussì el cuor sospira,
un strazzacuòr che no te dìgo e po' dopo quela canzòn:

- Ogni sera di sotto al mio balcone
sento cantàr una canzon d'Amore...
Vorrei baciar i tuoi capelli neri...-

" Dove ti zé dolse Amor quando che de scondòn
spazzisàvo soto le to fenèstre inpissàe e ti confusa
e modesta ti descostàvi un pochèto le coltrìne e mi
me bastàva par indovinàr le to forme co'l baticuòr
che to pare sigalòn e contràrio me vedèsse,
che i vissìni petegolòni tontonàsse e fassèsse maròn,
'lòra inventàvo versi che gavèva ale de colibrì parché
i se puzàsse su le altàne, li 'ndàsse soto le nàtole fin
a la to càmara virzinàl, savèvo che'l to sen pantezàva
che le to ganàsse deventàva de fogo, po' dopo su
le ale de'l garbìn rufiàn me 'rivàva l'eco de i to sospìri, de le calde promèsse, de i to basì 'passionài...

Oe pope...
e el remo se tònbola dolsemente
el va zòso po' dopo el vien sùzo vestìo de s'cènze de
vero bufà de Muràn, l'intardìga ingòrdo ne la fòrcola
tìvia squasi i fusse làvri e bràzzi de amànte e ela vestìa
de negro, vecia signora, misteriosa mascarèta la sbrìssa
via tra aque amìghe e nemìghe, la passa soto i ponti
che ghe fa da coròna, la cognòsse ogni pièra inbriàga,
ogni buso, rìva secrètra, i bàli tute curve de le àleghe
e su quela banchèta de velùdo rosso:
quanti inamorài
quante man che se strenzèva
sospiri
làgreme
òci estasiài
bòche 'vèrte da l'inbalordimènto
calde e stravolzènti dai basi...

La sera gera cofà un destàco da la persona cara
te sugàvo pian pianèto tute le giòzze su l'infazzadùra,
su'l fero, te vestìvo squasi la fusse 'na camìsa de merlèti
parché ti podèssi 'ndàr al balo de corte fin mezanòte,
te tacàvo a la brìcola co el cànevo che parèva 'na colàna
indoràda, no tanto strèta parché no ti te ferìssi, parché
no ti te perdessi a darghe confidènza a sàndali e bùrci,
ne'l scuro ciaciaràvi fisso fisso tra de viàltre:
bisibili
ruzori
ridadìne
finché stràche ve indormenzàvi ninàe da'l dondolon
de la sevènte e de la dosàna, altre volte ti stàvi a 'scoltàr
el fià de'l gregàl che strasportàva storie de zènte de mar,
de spiàge grèghe da la sàbia finissìma, de i profùmeghi
de vin de Sìpro, de incènsi e mira, de limòni e uèta,
de i sighi de i fanti de mar: Viva Venezia, viva san Marco!!!
te parèva de vèder sventolàr el liòn de san Marco,
a volte ti restàvi svègia tuta la note cofà un putèo che
'spèta la Maràntega, cofà 'na sposa che 'speta co ànsia
el zorno de le nozze, ma quel zorno purtròpo zé 'rivà,
se semo separài e go sentìo drènto calcòssa che se
ronpèva, la fine de un grando Amor, el vegnìr 'vànti
de'l fià fredo de la vecia signora vestìa de negro...
so qua sbandonà su 'na banchèta in riva de i S'ciavòni
davànti de mi repòssa san Zorzi Magiòr e da lontàn sbanpìsse
san Sèrvolo e san Làzaro ma no zé più come 'na volta,
'desso el bacìno zé pien de bàrche a mutòri, tuti core,
tuti ga 'na prèssa che no te dìgo no ghe n'inpòrta
se el moto ondòso sbarlèfa, se casca tochi de fondamènta
e de rive, la zènte zé canbiàda cussì tanto...

Còssa ghe ne sarà de ti vecia conpàgna mia, ti lo sa quante
volte che me fermo a vardàrte, de le volte anca de scondòn
par paura che ti me vèdi, te vardo quando che ti passi muci
tra le man de Memo so là sora su'l ponte de san Grisòstomo,
ti savèssi che ormài so vècio e le gambe me fa giacomo e i òci
no vede più ben come 'na volta, Memo zé zòvine e pièn de forza,
de mùscoli, el porta un recìn che va de moda, el tatuàgio de
'n'ancora sul bràzzo col to sacro nome, ti dovarèssi sentìr
l'ìnpito de la so fòrza quando che'l dà 'na siàda par no intressàrse,
quando che'l va premàndo e stagàndo, quando che'l va a secònda,
ti te ricordi gero anca mi cussì, me parèva de svolàr spece quando che 'ndàvo da ela, da la me Cate, fursi anca ti te capìvi 'sta smània,
ti gèri pì obediente, pì remissìva, 'desso no la ghe zé pì, la zé sola
ne'l bonìgolo de la lagùna, là in san Micièl, par covèrto la ga la
luna e el sol, par càsa 'na sbrancàda de sabion e barèna, par
conpagnia el fià de la lagùna...
Lo so Signor che tuto ga da finìr cussì quel zòrno fame trovàr
sòra la me gòndola, co'l remo in fòrcola in 'na note tìvia de
setènbre quando che la luna de despògia e vien zòso ne l'aqua
strigàda par farse ninàr cofà 'na fògia de'l fior spanìo de 'na rosa,
làssime portàr via calcòssa de la me Venezia, 'na baga de garbìn,
el resentàrse malissiòso de la s'ciùma su l'infazzadùra de la gòndola, i reflèssi de i palàzzi su'l liquido, l'eco de i fiòi che zoga
a canpanòn, su la vera de'l pòzzo, làssime sigàr par l'ultima volta:
- Pope...Oe...-
parché li ànzoli se inacòrza de mi che stago par ciapàr
'sto rio de l'ETERNITA'...

MI & TI
F. Dal Cin
28/05/2007

Mi, gò sempre da vardar el calendario
par inacorzerme de’l nostro aniversario.
Ti, invesse tuta ‘n’altra storia
le date, le te vien a memoria.

Mi, cussì de parole ghe ne ciapo
un saco e ‘na sporta
Ti, ti me sighi e dopo ti me perdoni
co ‘na bela torta.

Mi, me salva l’anelo co la data
de’l zorno vintioto
Ti, ti dizi che ne la vita gavemo
avuo solo culo roto.

Mi, penso ai me amissi
ai matrimoni de zà consumai
Ti, ti me fa capir che noialtri
invesse no se lassaremo mai.

Mi e Ti, tante borasche
co tante s-ciarie
ma'l nostro amor zè belo
saldo e sempre in pie.

 

EL PONTE NOVO
Anna Lia Giarolli (Migolina)

I 'o ga verto de nòte
come i fussa ladroni
che se gusta un tesoro
da venti milioni.

I 'o ga fatto in silensio
per tegnir fora ea voxe
de 'na cità incolerìa
che ea vive ea croxe

de chi che ea casa
se ea vede sfumar,
de chi che tra i orti
ghe toca migrar.

Ehhhh, semo tuti ignoranti,
no podemo capir
quanto i nostri fiòsofi
i ne vol istruir.

Ehhhh, semo ingrati, peociosi,
co sta fissa funesta
de un lavoro in cità
e quatro copi su 'a testa.

'Ntanto el ponte se staglia
co ea so boria infinìa.
E ea gente ea casca...
Che sia 'n allegorìa?

 

VECIO ARMARON
Fabio dal Cin

Opera d’arte, capolavoro
d' un bravo marangon
ti vien svodà de l’ànema
co 'l cambio de stagion.

Zigante de mogano
lustrà co la vernise
guardian de pelice, paltò
màge, braghe e camise.

Zorno e note sempre in pìe
co i teleri saldi e grossi
sento che al to legno
ogni tanto s-cioca i ossi.

Vecio armaron, grando e grosso
caro amigo a sìe ante
sò, che no ti me gà mai tradio
per sconder un amante.

SONO UN APPASSIONATO DI VOGA ALLA VENETA ISCRITTO DA OLTRE 30 ANNI IN UNA
SOCIETA' SPORTIVA A MESTRE IN PUNTA S.GIULIANO.
HO PARTECIPATO A DIVERSI RAID REMIERI E A 25 VOGALONGA.
QUEST'ANNO HO FATTO 70 ANNI E ASSIEME A ALTRI 3 COMPAGNI DI SOCIETA', DUE DEI
QUALI ANCHE LORO SETT'ANTENNI COME REGALO DI COMPLEANNO HO RIFATTO LA VOGALONGA.

 

11 MAGGIO 2008 34/a VOGALONGA

S.C.M. “ SANDOLO N° 14” PETTORALE N° 29
FRANCO – GIORGIO – BALDO - GIANNI

VOGALONGA ! ! ! AH CHE EMOSSION
NATA PAR CASO – TI XE PAR LA CITA’ NA TRADISSION

E CO’ GENEROSITA’ TI TE PRESTI
A DAR OSPITALITA’ A NOSTRANI E FORESTI.

COME NA SESSOLA DE PERLE DAI MILE COLORI
XE PIENA LA LAGUNA DE BARCHE E VOGADORI

CHE ALE NOVE IN PUNTO COL COLPO DE CANON
IN FIA E SE MOVE COME IN PROCESSION.

PAR SALUDO L’ALSA REMI – CHE I PAR CERI VERSO EL CIEO -
CH’EL DEVENTA UN CAPITEO - PIEN DE SANTI -

CHE INVOCHEMO A SALVAR STO BEN PRESSIOSO
DAL NEFASTO MOTO ONDOSO

SANDOLI – CAORLINE – GONDOLE – ALTRE CHE VIEN DA FORA
CANOE – DRAGONI – IOLE E MOLTE ALTRE ANCORA

DANKE – PLEASE – PARDON GHI XE BARCHE DE OGNI NASSION
CO DENTRO BIANCHII – MORI E ZALI CHE I VA A TORSIO NEI VARI CANALI

MA SCUSEMO STA GENTE CHE VA SPASSO
FRA CENTO E PIU’ PALASSI IN CANALASSO

CO MARMI E TRIFORE CHE PAR TANTI MERLETI
LASSEMOLI SOGNAR STI POARETI

CHE VEDER TANTA GRASSIA IN NA’ VOLTA SOLA
XE CERTO CHE GHE VIEN UN GROPO IN GOLA.
.
CHI VOGA IN PIE – CHI IN ZENOCIO – CHI ALL’INGLESE
CHI CO BEL STIL – CHI SENSA PRETESE
.
E VIA DE BONA LENA PAR TIRARSE FORA DA LA RESSA
MA A LA CURVA DEL NAVAL – GIA’ BARCHE CHE S’INTRESSA.

STAI - MOLA UN POCO - DA NA’ PREMADA
TI SENTI OGNUN CHE SIGA- PAR FARSE UN FIA’ DE STRADA.

SANT’ELENA – CERTOSA – VIGNOLE E SANT’ERASMO
NE LE RIVE BATE E MAN LA GENTE CO ENTUSIASMO.

COL VENTO E ONDE SE PASSA PAR BURAN
ISOLA LIGADA PAR FEDE A SANT’ALBAN

EL SO CAMPANIL - STORTO FIN DA L’ESISTENSA-
PAR CH’EL GHE FASSA A TUTTI DOVUTA RIVERENSA.

MURAN CHE DEL VERO XE SEMPRE STA REGINA
PAR L’OCCASION S’HA DIMOSTRA’ “ FREDDINA “

METTERSE UN POCO IN ORDINE PAR PRESENTARSE AL MEGIO
PRIMA DE ENTRAR IN CANAL DE CANNAREGIO

XE PIENE E FONDAMENTE DE GENTE E DE PASSION
CHE PORTA A TUTTI QUANTI UN POCA DE EMOSSION.

CHI VOL L’ALSAREMI – CHI FARTE NA’ FOTO – CHI CIAMA NANE O TONI -
PAR CINQUESENTO METRI I NE FA SENTIR CAMPIONI -
.
PASSA EL NONNO –OL FIO - OL MARI’O – GHI XE I SUI CHE LO SPETTA
MA DA LA COMOSSION - EL FA LA LAGRIMETTA.

NO SE POL TIRAR DE LONGO INVESTII DE TANTO AMOR
EL TE CAVA LA STANCHESSA – EL TE RIDA’ VIGOR

DE GRAN CAVATA SE FA EL CANALASSO
VARDANDO A DESTRA E A MANCA OGNI BEL PALASSO
.
RIALTO – ACCADEMIA – L’ARRIVO A LA SALUTE
ORMAI L’ENERGIE E GAVEMO SPESE TUTTE
.
ADESSO EL GIUSTO PREMIO CHE A OGNUN GHE SPETTA
XE SFOGIAR CO ORGOGLIO – AL PETTO LA “ MEDAGIETTA “

TUTTO QUESTO SE FA NO PAR BEA MOSTRA
MA SOLO PAR SALVAR “ VENESSIA NOSTRA “

GIORGIO BON

IL NOME DELLA "COSA"
[Lele Brunini]

Quel che le done ga de tanto belo,
e che Natura ghe ga colocà
dove se sa, ornà col so bel pelo,
in tanti modi al mondo vien ciamà.
Chi dise topa, e chi ghe dise fregna;
altri la ciama potta, ed altri tana;
parfin pucchiacchia gh’è chi dir se degna,
che a le nostre recie sona propio strana.
Ma el nome che su tuti da nu regna,
che zorno e note è sempre pronunsià,
ed ogni venessian l’ama e l’insegna,
xe vose che da i greghi è stà inventà.
MONA disemo: e un nome tanto bon
ben stava in boca a Sograte e Platon.

KOCISS
[Fabio Dal Cin 10/04/2008]

Qualchedun, pien de compassion
te gà coverto co un nissiol
poco prima, el vecio gondolier
da’l sgorlon, el se gà butà a pagiol.
Come ’l s-cioco de çento petardi
el mitra te gà ciapà
quando gera massa tardi.
La madama, fà el so mestier
indaga tuto intorno
nel barchin, màce de sangue
fà da contorno.
Nel ponte pien de curiosi
la zente spenze
mame impaurie, ai so putei
i òci, ghe coverze.

Fiol d’un can
azile come i gati
bandito venessian
che se rampega sui teti.
Malandrin amigo de tuti
co'l cuor e l’ànema bona
ladron de ori e bessi
drento ‘na Nobil carbona.
Avanzo de galera
speçialista in rapine
sfidando el destin
ze ‘rivà la to fine.
Al to funeral ghe gera
co la bara in spala
tuti i compari e
òmeni de la mala.
Per onoransa e rispeto
nel corteo longo e stanco
tuti i malandrini venessiani
gera in dopiopeto bianco.

PENSIGHE BEN......
[Alvise]

QUESTA XE DEDICADA A QUEI CHE SE CREDE GIGANTI
IN VENEZIAN "PARONZONI" I MEGIO DE TUTI QUANTI
I TE VARDA COL NASO IN SU' I PARLA COI "GUANTI"
SE DIXE CUSSI' MA QUA I RESTARA' DEI DILETANTI

TI GA VOGIA DE CREDERTE EL PIU'IN VISTA
DE DARTE ARIE DE SENTIRTE "PROFESIONISTA"
TI TE SVEGI NA MATINA POCA VOGIA E DOLOR
UN COLPO DE TOSSE NA FITA TI VA AL CREATOR

XE INUTILE ACANIRSE E CIAPAR TANTA "GRANA"
TI GHE LI LASSI AI EREDI CHE I SE LI MAGNA
XE MEGIO MORIR POVERO E IN GRAZIA DE "DIO"
LASSA CHE I DIGA PUARETO EL SE GA' DIVERTIO

COSSA XEA STA BORIA METERSE IN BEA MOSTRA
TANTO STA "VITA" NO LA XE "ROBA SI NOSTRA"
QUANDO CHEL CREDE EL NEA TOL PROPRIO "LU"
TI VA SOTOTERA E DE TI NO SE GHE NE PARLA PIU'

TI ME DIRA' MA MI LASSARO' NA BONA MEMORIA
TUTE BALE NISSUN XE STA MODEO IN STA STORIA
VEDI DE MOLARGHELA I XE DISCORSI DE BAUCHI
I TE DESMENTEGA SUBITO EL DISCORSO VAL PER TUTI

LASSEMO PERDER EL COMANDO BORIA E POTENZA
DE TUTI NOIALTRI EL MONDO POL FAR "SENZA"
I GA VOGIA DE FAR BEI DISCORSI E AUTORITA'
TI NO TI PARLI PIU' ORMAI TI XE DE " LA'"

E ADESSO DIME CONQUISTARO' EL "PARADISO"
MA LO GASTU VISTO VARDIME BEN IN TEL VISO
SISTU SICURO O SICURA CHEL GHE SARA' E BELO
LA' IN ALTO CO I ANZOLI CHE SVOLA NEL CIELO

FINISSO STI DO VERSI E IMPARA LA LESSION
DIVERTITE " QUA " IN TERA SE TI GA L'OCCASION
DIVENTA PIU' BON O PIU' BONA E TI GUADAGNARA'
UN TOCO DE AMOR E DE AFETO CHE TI TE GODI " QUA "

in memoria di FAUSTO S.

 

La Riva Dei Neri
[El Codega]

I riva a grupeti, co'l far circospeto,
I va sora el ponte e i se pusa al muretto.
I controla che de vigili no ghe sia intrusion,
po' i distira el nissiol e i fa l' esposission!
I ferma i turisti co modi invadenti,
i te parla sue rece co maniere esaudienti;
se la gente pero' no xe interessada
i la manda fan' culo, i la lassa che la vada!
Co i carabinieri i fa 'na irussion
i neri, 'sti bogie, i ga za l'informasion:
i xe pronti a scampar, dopo aver venduo,
cussi' i carabinieri i tol par el culo!
I vigili, invesse, i vien in borghese,
ma alora xe i passanti a farghe le spese:
I neri co i scampa i travolge tuti quanti
rebaltando omeni, done e infanti!
Caciari, Vianeo, Salvadori e via discorendo
i pensa che i venessiani i staga vaneggiando;
no i risolve el problema dei neri, perche'?
qualche interesse par lori ghe xe?

 

Basi sirocai
[ F. Dal Cin]

L'aqua se alza
spenta da'l siroco
la vien sù de scondon.
Anca i sorzi lo sà
sie ore la cala, sie la cresse.
El scuro de un sotoportego
deventa carbona per do inamorai.
Lavra morbide se verze
se serca, se peta e se trova.
Basi cofà la cola, cofà l'edera
no se destaca più.
Note de fogo, note
che fà sognar i morosi.
Sta aqua deventada
so rufiana.
24/07/2007

 

Mezzanotte
[ Riccardo Roiter Rigoni]

Silenziosa la notte
e buia come il fiume
che muto scorre
nel lento avanzar
del giorno che muore
e che nasce

Lunghe spirali di nebbia
s’alzano eteree dalla corrente
accarezzando la fioca luce
dei lampioni silenti
in un giro di walzer
di cui nessuno s’accorge

L’ala del sonno
porta aldilà di ogni confine
e delicata avvolge
i rintocchi distanti
della vecchia campana
E’ l’ora dei sogni..

 

Mezozorno de fogo ...in laguna
[F. Dal Cin]

Vardo la me laguna...
penso che bela come ela
no ghe né nissuna.
Taco la barca co la caena
'po' ciapo la solana
vardando la barena
Ogni tanto un cievolo
salta fora da l'aqua
co ‘na s-ciompa
par, che’l vogia
vedar che ora che zè.
Tuti gà fame, zè mezozorno
el sol zè impissà come un forno.
Le folaghe se buta zò
in caòrio sù le anguele
come aerei in pichiata
ma le ‘torna squasi
sempre a sate vode.
I cocai invesse se ciama
fra de lori, par che
i se domanda chi sogio mi
pò, da sora le paine
i se buta zò uno co st'altro
par ciaparse'l posto al sol.
Le bricole, tute in fila come
soldai, le sta su l’”attenti!”.
In barena intanto, i granzi co la coraza
se move come cari armai
contro bande de pantegane
grande come porsei

 

5 SCHEI de MONA
[F. Dal Cin]

A Venessia, aver “5 schei de mona” in scarsela
vol dir farse furbi o portar le robe
a proprio favor o in sportela.

Figurarse se mi no me porto sempre drio ‘sta monea in arzento
coniada da un orafo svegio e pien de portento.

Gò da esser stà in pigiama o de sicuro mezo nùo
quela volta che, in “5 minuti de mona” so stà cussì tanduo.

In “5 secondi de passion” gò subito finio
e dopo 4 +5 mesi de pasiensa,
zè nato quel fantuin de me fio.

 

El ghebi
[F. Dal Cin]

Par chi no lo savesse, la parola “GHEBI” stà par Vigili Urbani
zè cussì che ciamavimo lori, noialtri fioi venessiani.
I ghebi gera par noialtri bocie che zogavimo a balon
el primo pericolo e la nostra ossesion.
Par ogni semestre, lori gaveva ‘na bela divisa
blù quela de inverno e bianca quela estiva.
Ma lori ghebi gera pieni de sorprese
a volte i ‘rivava parfin in borghese.
Però savevimo che se uno de lori gera drio fumar
voleva dir che no’l gera in servizio
invense sensa sigareta in boca
se sperava che no’l gavesse perso el vizio.
Par lori, ciaparne e darne la multa gera el sò mestier
par noialtri fioi invense, S. Polo contro S. Silvestro
la sfida più granda de tuto el sestier.
Ricordo che i ghebi, come a un apuntamento
pur de ciaparne, lori 'rivava da ogni calle
proprio ne'l stesso momento.
Par scamparghe via cussì bisognava esser
svelti e furbi come volponi
parchè lori puntava su'l balon
o sù i nostri capoti e giaconi.
Tasi che 'na volta, gera istà e l'acqua in rio poco sporca
parchè sò 'rivà a casa nuando par aver ciapà 'na calle morta.
Na volta sola gò ciapà la multa, ma per 'na mala sorte
chi gà fato la spia zè stà el “Ascaro”
dizendo a i ghebi che gero sconto in corte.
Ghe gera un ghebo che oramai el zè in pension
che co'l me vede ancora 'desso
de tirarme per 'na recia el gà la tentasion.
Un zorno, a sto povero vigile urban,
ghe gò portà via el balon da le man.
Lo portava in central come trofeo,

e mi ghe lo gò rubà proprio su'l più beo.

A proposito de schèi...
[Gianni Vivian]

Queli che ga tanti schèi
ga messo in ziro la vose che i schèi
no dà la felissità,
fegurèmose e dèbiti e la mesèria!!!
Queli che ga senpre manegià pochi schèi,
che no zé mai stài boni de fàrghene
par difèndarse da e critiche,
par farse dir che i zé filosofi,
par far vèder che i zé destacài da tute
e debolèzze de la Vita
i dise anca lori che i schèi no zé tuto,
buzarèti che no zé tuto,
ghe zé anca e rèndite, assìon, obrigassìon,
bot, cct, case, ori, diamanti, dolari, sterline,
terèni, fabriche e tanto altro...
Se ti ga tanti schèi da far schifo
ma ti zé bruto cofà el pecà, scancànico,
despossènte, ti resti senpre un tipo interessànte,
che le beleza in t'un omo no zé necessaria,
ma se al contrario uno al de sora de tuti 'sti
difèti no'l ga gnanca i oci par piànzer,
se el zé scanà, spiantà, un pòvaro giòpo,
'lora ti zé e ti resti un mostrìcio e basta...
Se ti ga tanti schei da podèrte negàr drento
ma ti zé inbastìo co e azze brune, ignorante
e indrìo cofà la coa de'l can, vian, sgàlmaro,
mezo inafabèta 'lora nissùn ga el coràgio
de dìrtelo su'l muso, ma se ti zé insanguanà
ne la mesèria 'lora tuti te sàlta 'dosso,
i te stròpa la boca e i te dise:
- Tàsi mona!!!...-
Se ti ga tanti schèi fin da gomitàrli
e ti ga de bisogno de 'na visita, de un
consulto co de i professoròni, de 'na
operassìon, de un ricovero in clinica
de lusso o a l'estero, 'lora i te vien tuti drìo,
ti zé servìo e riverìo in guanti bianchi,
ma se ti zé un pòvaro pitòco, un mutuato,
uno co la pension de invalidità, quela social,
la minima, 'lora i te mete in nota, in còa,
quatro, sie, oto mesi, un ano, i te sbate
da un ospeàl a 'st'altro, i te tien dièse ore
al pronto socòrso, in barèla in coridòio,
in astanterìa par intière zornàe senza un
giòzzo de aqua, senza 'na medesìna,
squasi che ti fussi pèzo de 'na bestia...
Chi che ga schei e amicissìa
orba anca la Zustìssia, se ti ga tanti schèi
da nuàrghe drento 'lora te ciàpa la malatìa,
l'osessìon, la frève de fàrghene tanti altri,
cusì trafegàndo, furegàndo, pagàndo, ti te
secùri la conplicità de polìtichi, banchieri,
prestanòmi, biseghìni, aministratòri de tuti
i tipi, piduisti e afarìsti, cussì quando che
s'ciopa la pignàta, el postièma, 'lora muci
de zecagarbùli, magnacarte, i otièn rinvìi,
aresti domiciliari, ricovèri in clinica de lusso,
i te fa passàr come vìtima, uno che no ga
proprio tute e fassìne al covèrto, che i te ga
costrèto contro vògia, cussì par i amìssi
la Lege vien interpretàda, invèsse par tuti
'st'altri che no conta gnente la vien solo aplicàda,
se par caso ti zé un pòro desgrassià che ga
tolto su un pomo par fame, 'lora i te salta
'dosso e i te dà el massimo de la pena,
i te sbate in galèra e i buta via la ciàve...
Se ti ga tanti schèi fin da vergognarte,
'lora tuti zé pronti a vèrzerte e porte,
tuti i salòti de moda fa a gara par invitarte,
tuti te copia come che ti te vesti, cossa
che ti disi, cossa che ti magni, tuti che core
a intervistarte, òmeni e done che fa a gara,
a bote par farse vèder insième co ti, par
'ndàr in leto co ti, se invèsse ti zé èsule,
senza nissùna consolassìon finanziaria
e de famègia, 'lora tuti zé pronti a seràrte
e porte e i cancèli su'l muso, a insolentìrte
a molàrte drìo i cani...
Purtròpo questa zé la menàda, la realtà:
- La Vita zé fata a scale
chi va su e chi vien zo
e chi che se o ciapa ne'l popò...-.

I quatòrdese ani de Giulia
[Gianni Vivian]


'Desso che ti brinchi co e to man
'ncòra da putèa i cavèi sgrendenài
de 'na Vita cussì difìssiele da capir,
che te ga mostrà la so ganàssa
cussì rùspia e freda
e che te ga robà el tesòro più grando
che vien 'ncòra prima de'l vero Amor,
'desso vardo i to oci che de e volte
i zé cussì lontàni, cussì seri,
persi in un svòlo de sisìle che va
al de là de'l mar par trovar l'antìgo nio
e drento serco de robàrte qualche ragio
inprovìso de la so luse, serco 'ncòra
de 'scoltàr el son de la so vose...
Pìcola mia
cossa pol donàrte 'sto pòvaro vècio,
qualche monèa rùzene,
qualche verso dessavìo,
dai pòrtime co ti, pàrlime 'ncòra de i to
insògni, de la primavera che vien,
còntime de i oci de lu, de e to prime pène
d'Amor, regàlame un insògno anca se el zé
ormài consumà e da butàr via,
mi sarò in t'un cantonèto senza desturbàrte
a far la spièta su'l to doman,
a catàr su qualche frègola de felissità,
qualche inbriagaùra de zovinèzza,
destàca pur fòge de'l fior spanìo de malgarìte,
'scòndi ale de pavège drento al to diàrio,
prepàra un tapèo de tuberose par quando
ch'el vero sentimento rivarà a far svolàr tuto
cofà marùbio che gnente pol fermàr
e la ganàssa de la Vita deventarà slìssa
e calda cofà el strucòn de 'na mama,
ti vegnarà vestìa co la velàda da fiàba
de la Cuzzasènare e el to principe no gavarà
oci che par ti, no ghe sarà più nissùna mezanòte,
nissùn tòco te fermarà, ne'l cassetìn da zoge
de pière prezziòse ti fondarà e man,
ti torà suzo tuto quelo che te 'spèta,
ti gavarà el to spìgolo de sièlo
e la to belèzza ti la sparpagnarà al mondo
e su 'sto me stràco cuor...

Vien co mi nevòdo...
[Gianni Vivian]

Par 'na volta mèti da parte tute
'ste brute robe moderne che fa
presonière l'ànema, che incaèna
la fantasia cussì da esser seleghèta
da e ale simàe...
Dai...cavèmose via e scarpe, a pie nui,
stà 'tento che nissùn ne veda, vegnìva
i massariòti a l'alba ne i oci i gavèva 'ncòra
e onbrìe de la note, ne e man i cài, e la
fadìga de'l viver pituràda su'l muso,
cantàva la falza el so lamento, la urlàva
quando che la pièra da guàr ghe sgrafàva
el filo da tàgio consumà, i suòri vegnìva zo
a bruzar i oci e anca l'ànema, tuto 'torno
se sparpagnàva el profùmego de la spagna
'pena tagiàda che savèva da bon come el pan,
passàva e done co la forca par ziràrla, ghe gera
chi che gavèva lassà casa l'ultimo nato,
chi che cantuzzàva pensàndo a l'Amor
'spetàndo la sera par dopo podèrlo vèder
quando su l'ara e tose fassèva bozzòlo...
- Su...su...no stà 'ver paura...làssate 'ndàr,
rodolàte, resta a panza par aria a vardàr el sièlo,
par che tuto stàga ziràndo, che la melòna
te vada tòrzio, e zé e nìole che el vento spènze...
'Scòlta!...El zé el sigàr co l'istèsso ton de e sigàle,
el ruzor grosso de i bonbi, el verso romìto de 'na rana
in Amor, ti lo sa portàvo casa vasèti de vero pièni
de ranabòtoli e salamandre, pavège e mosche d'oro,
s'ciòsi slimegòsi che dissegnàva bave strigàe
che soto i ragi de'l sol e parèva arzènto colà...
- Vegno...vegno...làssame 'ncora un fiantìn, làssame
seràr i oci par ritrovàr zorni tanto lontàni...
- Si...si...e sento e zé e osi de Luigino, Lele, Paolo, Mario,
gavèvimo e ganàsse rosse cofà el fogo, el pantezàr
de i nostri pèti pièni de fili de erba, la ùa robàda,
po' dopo rivàva el contadin sigàndo cofà un mato,
alzàndo el restèlo cofà 'na spàda...
- Se ve ciàpo fioi de cani!!!...-
e nu altri a corèr cofà liègori co'l cuor in gola,
se trovàvimo tuti scaturìi e spasemài a bèver
a sgargàtele soto la boca fresca de la fontàna...
- Vegno...vegno!!!.-

Lalo sbocalòn
[Gianni Vivian]

El so nome gera Giancàlo
ma tuti lo ciamàva Lalo sbocalòn
par quel vìssio che'l gaveva quando
che'l gera inbriàgo de gomitàr un saco
de parolàsse e biastème...
Un giòpo mal costruìo, patìo dai brodi,
co i cavèi senpre de sgrendanòn, la barba
senpre longa e dura cofà quela de un giudèo,
la rabàlta de le braghe a zenòcio co un mùcio
de tache e de màce come de uno che se
pissa 'dòsso...
No'l gavèva una lavoro fisso, a volte i lo
tolèva a zornàda quando che'l gera sinsièr,
lavori de fadìga par dopo pagàrlo co de i fiaschi
de vin de mile segnàti, de'l tabàco da naso o
de'l trinciato forte...
Par fortuna che'l gavèva la sbòrgna bona:
- Zè vero che ti zé me amìgo?
fèrmate...'scolta...i zé de i bògia...i me fa palàr
montagne de leàme...si merda de vaca, e po' i
dise che la merda fà schei, ma mi de schei gnanca
'na palànca...a mi me resta solo la merda...
Che Dio li spòlpa!...
Dopo 'sto sfogo, 'ste pantomìne ogni tanto el
fassèva el pàpolo...
- Dai Lalo, molèga...vien che te conpagno casa...
e lu se fassèva sostentàr, puntelàr cofà un baro
de erba che zé drio cascar da tute le parti...
La casa gera 'na carobèra, un pagiòn de scartòzzi
par leto, el cascàva zo cofà un saco de patate,
el ronchizàva fassèndo tremàr anca i copi
ne'l so mondo fato de ingiustissie e de leàme...

 

Pope el me gato...
[Gianni Vivian]

Pope nualtri bestie a do ganbe disèmo
che un ano de i tui zè come sète ani de Vita
de la nostra,
òu Pope,
svègia ma no ti vedi che avendo za dodèse ani
su'l gropòn ti te ritròvi ben otantaquatro barète,
anca se ti ga 'ncora tuto el to pelo rossèto,
se ti par un vecèto in fresca e intrànte
no ti te ga inacòrto che l'altro zorno te zé cascà
un dente cagnin, anca se ti zé un gato,
che ti scomìnzi a far fadìga a saltàr su la piàna
de'l balcon e a vegnìr zo, che ti dormi squasi
tuto el zorno tanto che par che ti gabi el mal
de la nona, ma no ti pol farghe gnente quando
che 'riva la stagion de i Amòri, el GATARO,
se trata de quel tormento che te càpita drento
a l'inprovìso, nualtri bestie a do ganbe ne toca
la stessa roba, el te sconbùssola el sarvèlo,
el te ròzega, el te buta co'l culo in su, el te fa
pissàr 'dosso, el te contùrba, el te desbùssola,
la stessa bruzadùra, ti gavarà fursi fato caso
anca ti che espressìon tra el mona e el beato
che gavèmo piturà su'l muso, lunica roba che
ne fa difarènza zè che nualtri no se semo 'ncora
redùti a segnar el teritorio come che ti fa ti,
ti te imàgini se 'ndàssimo a pissàr su le porte
de casa de la moròsa, sui cantòni de i palàzzi,
sui cancèli, robe da mati, robe da galèra!...
Le gate... ma no ti me 'scolti mai!!!
te lo digo e te lo ripèto ma no ti vedi che no ghe
ne zé più nissùna in circolassìon, o le zé massa
vece e saràe su senpre drento casa, castràe, cusìe,
senza più queli ziramènti de ormoni, quel calòr,
el verzèrse de la vovèra, insòma le par quele vece
e tonde ciòce de fèmene co'l culo grosso
che 'speta solo de deventàr none...
L'altra note ti zé 'ndà a torte in passo co quel
gatòn co la testa grossa cofà un toro, si quelo
che ga manco de la metà de i to ani e el triplo
de peso, ma cossa te zé vegnìo in testa de desfidàrlo,
el te ga dà 'na remenàda che Dio dise basta,
un fràco de bote, el te ga fato el culo cofà 'na rosa,
ma ti ga visto in che condissìon che ti zé tornà casa,
no ti gavèvi gnanca la forza de montàr su la carìega,
senza fià, òcio, òcio che stavolta el tira i spaghi:
El muso tuto sgrafà, la boca rota, 'na zata che parèva
in cassèla, 'na morsegàda su'l peto che se gavèva
tuto sgionfà cofà 'na zanpògna, e la spuzza!
Si ti spuzzàvi da far moto de stomego, ti revelàvi
de pisso e de freschìn e de altri sento segnàti...
Ma ti zé mona, ma tanto mona,
bastàva che ti me dimandàssi un parèr, un consìlio,
anca schei e mi te gavarìa agiutà, dito de si,
parchè se fa questo e altro par un amìgo, se no se
se agiùta tra de nualtri mas'ci! (bun!!!), te gavarìa
tacà con un nastrin sinque euri al colo,
go visto tante bele gatèle che fursi vien da l'est
e da l'africa, roba da cocolòn, da lassàrghe i oci...
Ma si no stà far el cetìn, el basabanchi, el moralista,
ti savèssi quante bestie e do zate tute le note va a
càzza de pòvare desgrassiàe butàe su'l marciapìe,
ma serto, tanto mègio che ti pol farlo anca ti,
ti no ti ga da rèndarghe conto a nissùn de le to assìon,
nualtri bestie a do ganbe si!!!.

 

 

El scherzo...
[Gianni Vivian]

- San Piero...San Piero...finalmente zè 'rivà
un mortàl...
- Gera ora! fàlo vegnèr 'vanti!
- Fio caro quelo che ti vedi qua zé el Paradiso,
ti pol mòverte, 'ndàr dove che ti vol,
ma ricòrdate che se sèna a le sete in punto...
a le sete...me racomando...puntuàl!...
- Chissà come che se magna ben in 'sto liògo,
mi che me piàse tanto, su la tera go senpre
giubilà, pochèto da rozegàr, tanta polènta
e late che me vegnìva parfin fora da li oci
e da le rece, i me ga contà che questo zè
un posto dove che sbrissa via late e miel,
'ròsti de tuti i tipi, vin da inbriagàrse, dolsi...
- Eco la to scuèla de polènta e late!...
- Polènta e late?...
- Si fio mio, polènta e late, questo passa
el convento!...
'Sta roba va 'vanti par zorni e zorni, setimàne,
ogni sera senpre la stessa sòlfa...
- San Piero posso farte 'na dimànda ? Dove zè
tuta quela bona roba che i me gavèva promesso?
Parchè senpre e solo polènta e late?
- Ma no ti vorà miga che solo par mi e ti
el cogo meta su pignàta!..E po' dopo che ti zè
qua, fame 'sto piassèr, no sta còrer a quel modo,
va pian che qua no semo su la Tera...
- Ma San Piero a mi te me disi 'ste robe, no ti ga
visto chel mato co che la Feràri targàda Belùn
come che'l core?
- Ma qualo mato, ma quala targa de Belùn,
ma no ti ga visto che quelo zé el Fio de'l Paròn
e che la targa zé quela de Betlème!...
Intanto i sona el canpanèlo de'l portòn...
- Chi zé? - siga San Piero...
- Do capussìni!..
- No i vògio, mi no go ordinà gnente, portàli indrìo!...
- Pièro!..
- Si Maestro!
- Inpìssa un fiantìn el satelitàr che vogio vèder cossa
che casca la zo su la Tera!
- Subito Maestro!
El schermo se inpìssa proprio su 'na minièra,
òmeni onti e sporchi cofà sorzi e tonpinàre,
tuti suài bonbi, desfegurài a scavàr carbòn,
un spetacùlo da far paura, robe da far vegnèr i sgrìsoli...
- Ma questi chi zèli?...saltàndo da la carièga...
- Ma Maestro, questi zé li òmeni, l'umanità, no ti te
ricordi quelo che te ga lassà dito?...
- Cossa go lassà dito?
- Ti ga lassà dito che i doveva guadagnarse el pan
co'l suòr de la fronte...
- Si lo gavarò dito in un momento de ràbia,
lo gavarò dito PAR SCHERZO!...cànbia...cànbia
che me vien l'angòssa!
'N'antro canal, nova sèna. nova vision...palazzi de'l Vaticano...
ori, stuchi, marmi, baldachìni, statue, pitùre, òmeni
bei bianchi e rossi, panze tonde, tuti ben passùi,
man bianche, nète, curàe, piene de anèli, crosi de oro...
- E questi chi zèli?...saltàndo senpre su la carièga...
- Questi, Maestro ze queli che ga capìo EL SCHERZO!...

 

La stagion morta...
[Gianni Vivian]

- Ciò se deventà metereopatico!
- Puarèto, ma se trata de 'na bruta malatìa?
- Ma no cocalòn, el zé quel destùrbo ligà
ai fenonòmi de'l canbiamènto de Tenpo...
- Ah, chissà cossa che me credèvo!
- Oh tenpi beli, tenpi de la me zoventù quando
che no ocorèva 'spetàr el zèfiro ingaladòr de marzo,
gavèvo el sangue tuto soto sora che sbrissàva via
de tonbolòn come rio de montagna...E chi sentìva
el fredo can de l'inverno anca se ghe gera solo la
cusìna scaldàda e gnanca par tute le ore de'l zorno,
tra el issolàr, el coràr fora a far le sbalocàe de neve,
a far el pagiàsso, a far la granatìna, a ciuciàr i pìroli
de giàzzo, li stivàli deventàva indurìi, le bugànze
pissegàva e fassèva spìssa, le ponte de i dei deventàva
prima rossi e dopo blu par i diagòlini, i mussìni al naso
i parèva candelòti...
...Tira su che Venezia se nega!...
Intanto el Tenpo par che no'l pàssa mai, ma el pàssa stà
tranquìlo anca massa in prèssa, cussì no ghe zé più
le meze stagiòn, zé restà solo l'inverno co'l so fià zelà
e che tuto fa deventàr duro fora che dove gavarìa de bisogno...
El canbio de stagiòn...La fiàca de la primavera, el tiràr
el siegòn ne l'afa de l'istà, la malinconia de l'autùno,
i sfredòri de l'inverno...No ghe zé più el formàgio grana
de 'na volta, le òstreghe de 'na volta, e po' tuto che'l fogo
che se ga stuà drento restàndo solo sènare e sènare, quel volèr
corèrghe drio a le done senza savèr più el parchè...
Ma che sia 'rivà el momento de torse la coròna?...
- Dise le proverbio che co'l cavèlo buta al bianchìn
làssa le done e bùtate al vin!..
- Che sia colpa de la pressìon? De la pròstata?
- Che sia mègio scrìver poesie?..
- Sarà mègio...zè mègio...

Balàda per Venezia
[Gianni Vivian]

Amìga mia note
involzèa su ne' sial de tela bonbasìna
parchè la possa coverzèrse le ferìe
visto che la se sente vegnìr fredo al garbìn...

Cantè...cantè...
sonè...sonè...
arpe e cenbali
par la Serenissima che zé drio morir!

Amìgo mio sol
rescàlda le so pière come bràsa
parchè da le so marze e patòche vìssare
possa sbaporàr el càncaro de l'umidità...

Pianzè...pianzè
sighè...sighè...
spini e tormenti
par la Regina che zé drio morir!

Amìgo mio calìgo
covèrzela co'l fumo de i ricordi
parchè la so belezza 'ncora piasènte
possa donàr un altro menuto de Amor...

Incensè...incensè...
sparpagnè...sparpagnè...
sènare e incenso
par la Martire che zé drio morìr!

Amìgo mio vento
pòrta el to fià tra cale e canpièli
tra squèri e altàne
par far ruzàr el vecio leon...

Butè...butè...
zapeghè...zapeghè...
veri e contarìe, zoge e ori
par la Siòra che zé drio morìr!

Amìga mia luna
porta i to recàmi a iluminàr
'sta pièra d'Istria cussì consumàda
parchè la possa 'ncora 'ndàr al balo...

Intagè...intagè...
piturè...piturè...
le so fatèsse, el so corpo da sirena
par 'sta Afrodite che zé drio morir!

Amìgo mio zorno
daghe un scorlòn contro el so lassàrse 'ndàr zo
finchè i so colori che imatonìsse
possa 'ncora cronpàr un momento de matità...

Balè...balè...
saltè...saltè...
gavòte e morèsche
par 'sta Bagàssa che zé drio morìr!

Amìga mia piova
làva e sgiànza
cube e ponti, palàzzi e cese
par un novo batìso de Resuressìon...

Lodè...lodè...
resitè...resitè...
poeti, mùsichi, cantòri
par 'sta Musa che zé drio morìr!

Amìga mia aqua
cùnala ne i so sbàndoni
quando che le so pière
se desfa come l'andàr in gròlia de i amanti...

Volìghe ben...volìghe ben...
basèla...basèla...
tochèla...tochèla...
par 'sta Amante che zé drio morir!

Amìga zente
zapeghèla dolsemente
caressèla come 'na mama
par un Amor che no finìsse mai...

Parecè...parecè...
lighè...lighè...
gilànde e corone
par 'sta Santa che zé drio morìr!

Sighè...sighè...
urlè...urlè...
predichè...predichè...
a paesi e sità
a monti e mari
a nassiòn e al mondo
al sol e a la luna
che ela zé fata come nuàltri
co le so pière de carne
co i so rii de sangue,
che la vol ben
e la vol che i ghe vogia ben
no se pol sbandonàrla
covèrzerla ne la desmèntega
butàrla ne'l scordo
parchè anca ela ga 'n'ànema...

Ai siòri de la Guèra...
[Gianni Vivian]

Che Dio te manda el tifo, el tanfo,
la rogna, el ganfo e el simiòto incrosà,
che Dio te mada pan e pesse e un spin
rovèrso in culo, che te vègna un càncaro
e la giandùssa, el mal de la pièra,
un sbòco de sangue, el mal de la limèga,
'na fìstola co tuto el fistolàro,
'na mossa de corpo da svodàrte parfìn el buèlo,
li peòci e le gèndane, el mal de'l moltòn,
le croste de tute le piàghe, la tègna,
un espùrgo, le pacèle, el mal de'l pissòto,
che no ti gàbi da trovar pase gnànca dopo morto
par el to carognèzzo, l'ingordìsia,
par quela vògia de 'ver vossùo, de volèr,
de ciapàr tra le to man tuto l'oro de'l mondo,
de copàr e mazzàr altri òmeni
senza volèr capir che come el giàzzo spaca
le zòpe cussì ogni omo ga el dirìto de viver
e de morìr de la so bona MORTE
e che el sangue de tuti 'sti nosènti
siga e sigarà par senpre vendèta a le So Rèce...
I ne parla de Patria e de sacri confìni: 'na bela CIAVADA!
El nemìgo...UN PORO CAN, un desgrassià come
de mi da copàr senza savèr el parchè!
L'eroe...UNO CHE NO GA TUTE LE FASSINE AL COVERTO!
Re, presidenti, industriali, zeneràli, senziàti,
inventòri, teòloghi: BOGE E BECHERI!
Ma 'lora quando zé che finirà tuto questo...Quando?
MAI...MAI e poi MAI...
Parchè carne umana no zé mai sàzia...

 

Amor pràtonico...
[Gianni Vivian]


Làssate voler ben a modo mio,
farèmo l'Amor pràtonico, dai no
stà dimandàrme cossa che vol dir!
Dai che ti lo sa anca ti!
El zé un rapòrto tolto in prèstio da
'n'idea spiritual de la Vita che porta
a l'elevassìon, a l'esaltassìon de lo Spirito...
e po'...po' dopo no ghe zé bisogno
de rivestìrse dopo che se ga fato l'ato materiàl,
no se ga mai paura de 'ver fato 'na bruta fegùra,
no ocore fumàrse nissùna sigarèta, e par la
fèmena no inporta se la se ga desmentegà
de tor la pìrola, quela de ancùo, de'l zorno dopo
e altre amenità de'l zènare...
No esiste nissùna paura de ciapàrse calcòssa,
nissuna malatìa, nissùna paura de restàr insìnta,
nissùn inpegno e de conseguenza nissun tradimento,
pentimento, stanchèzza, gnènte de gnènte,
'na bubàna...
- Ah, buzarèti, e questo sarìa l'Amor che ti me
ga promesso, l'Amor che ti vol! 'ndèmo ben,
ma ti podèvi dìrmelo che ti ga razònto la PASE
DE I SENSI, che no ti ga più fià par fàrghela,
che te manca le forze par sèrti sfòrzi, no ocorèva
che ti menàssi el can par l'ara...Ma ti te rendi conto
che mi go squasi vint'ani de manco de ti, che go
'ncora el sangue che me bòge, che so 'na inguarìbile
romantica e che me piàse far Amor co tute le so
robe a posto, come che natura comànda, invèsse
el gran poeta, el filosofo vol l'Amor pranònico...
- Ma no cara, pràtonico!
- Ma si pràtonico come cazzo se dìse, ti ti vol questo,
ma va remèngo tuo, 'lora godi co le to poesìe,
mastùrbate co le to fantasìe pindàriche, i to tiramènti
spirituàli de 'ma mente malàda, co i to endecasìlabi
de merda, le to metàfore che fa gomitàr,
e po' ti sa cossa che go da dirte che gnanca le me
piàse le to poesie, un putèlo scrive megio de ti...
- Adìo poeta...a mai più rivedèrse...làssa star
che i cafè i pago mi...Adìo vate...anzi vàter...

Càncaro!
[Gianni Vivian]

De famègia el gera Tagliapietra
che vegnìva da Buràn ma tuti
lo ciamàva Memo Manarìn,
un scancànico de omo tanto
da parèr un morto, 'na sièra da scorèze,
el deo de mezo e quelo forbiòci de la man
drèta gera de un color maron scuro par
tute quele sigarète fumàe, 'n'Alfa spaca palmòni
una drio de 'st'altra tanto da inpissàrle
co'l stesso mosegòto...
Uno de meza spenta, la fadìga de respiràr,
ghe vegnìva fora squasi un ràntego, quando
che'l verzèva la boca ghe ne vegnìva fora
el gàtolo co l'ànema da 'ndar indrìo schena,
queli do ultimi denti restài tacài su come
par miràcolo, do brìcole marze che stava
in pie par scòmessa da la tinta che no se vedèva
ben, un color testa de moro co reflèssi negri...
Ogni tanto ghe ciapàva un colpo de tosse
inprovìso, da sbregàrse in do, un ruzòr, un fìs'cio,
un rugnàr da far paura, le vene de'l colo se sgionfàva
cofà do balonsìni, i oci i parèva che li volèsse
vegnìr fora da le incavaùre, el color de' muso canbiàva:
Rosso de bògio
rosso gardenàl
blu mar in boràsca
viola quaresima
negro funeràl...
'Lora el sercàva l'aria, el fassèva sforzi talmente grandi
par libaràrse da'l catàro che gera drio sofegàrlo,
un spùo tra el zalo e el verdàzzo che fassèva vegnìr moto
de stòmego a chi che ghe stàva vissìn, quando che tuto
gera finìo el restàva sbatùo cofà 'na stràzza da lavàr,
strucà, sbrindolà, da butàr via, ma la sigarèta no la gavèva
mai molàda, dura, schinzàda tra i dei...
Volìo saver l'ultima, la cogionàda de'l destin,
a lu no ghe zé vegnìo el càncaro, ma el ghe zé vegnìo
a Sguàldo so cugnà, 'na perla de omo, uno tuto casa e cèsa,
uno che no beve e che no ga mai messo in boca
'na schifòsa sigarèta...

Balàda per Venezia
[Gianni Vivian]

Amìga mia note
involzèa su ne' sial de tela bonbasìna
parchè la possa coverzèrse le ferìe
visto che la se sente vegnìr fredo al garbìn...

Cantè...cantè...
sonè...sonè...
arpe e cenbali
par la Serenissima che zé drio morir!

Amìgo mio sol
rescàlda le so pière come bràsa
parchè da le so marze e patòche vìssare
possa sbaporàr el càncaro de l'umidità...

Pianzè...pianzè
sighè...sighè...
spini e tormenti
par la Regina che zé drio morir!

Amìgo mio calìgo
covèrzela co'l fumo de i ricordi
parchè la so belezza 'ncora piasènte
possa donàr un altro menuto de Amor...

Incensè...incensè...
sparpagnè...sparpagnè...
sènare e incenso
par la Martire che zé drio morìr!

Amìgo mio vento
pòrta el to fià tra cale e canpièli
tra squèri e altàne
par far ruzàr el vecio leon...

Butè...butè...
zapeghè...zapeghè...
veri e contarìe, zoge e ori
par la Siòra che zé drio morìr!

Amìga mia luna
porta i to recàmi a iluminàr
'sta pièra d'Istria cussì consumàda
parchè la possa 'ncora 'ndàr al balo...

Intagè...intagè...
piturè...piturè...
le so fatèsse, el so corpo da sirena
par 'sta Afrodite che zé drio morir!

Amìgo mio zorno
daghe un scorlòn contro el so lassàrse 'ndàr zo
finchè i so colori che imatonìsse
possa 'ncora cronpàr un momento de matità...

Balè...balè...
saltè...saltè...
gavòte e morèsche
par 'sta Bagàssa che zé drio morìr!

Amìga mia piova
làva e sgiànza
cube e ponti, palàzzi e cese
par un novo batìso de Resuressìon...

Lodè...lodè...
resitè...resitè...
poeti, mùsichi, cantòri
par 'sta Musa che zé drio morìr!

Amìga mia aqua
cùnala ne i so sbàndoni
quando che le so pière
se desfa come l'andàr in gròlia de i amanti...

Volìghe ben...volìghe ben...
basèla...basèla...
tochèla...tochèla...
par 'sta Amante che zé drio morir!

Amìga zente
zapeghèla dolsemente
caressèla come 'na mama
par un Amor che no finìsse mai...

Parecè...parecè...
lighè...lighè...
gilànde e corone
par 'sta Santa che zé drio morìr!

Sighè...sighè...
urlè...urlè...
predichè...predichè...
a paesi e sità
a monti e mari
a nassiòn e al mondo
al sol e a la luna
che ela zé fata come nuàltri
co le so pière de carne
co i so rii de sangue,
che la vol ben
e la vol che i ghe vogia ben
no se pol sbandonàrla
covèrzerla ne la desmèntega
butàrla ne'l scordo
parchè anca ela ga 'n'ànema...

‘NA STORIA VERA…O ‘NA BUSIA?
[F. Dal Cin 05/03/2007]

Prima che me mola par strada la fantasia
scrivo e ve‘conto‘na me storia o‘na busia.

Fassevo le scuole alte par imparar
da razonier e anca l’italian
alte parchè la me aula gera
sù al terzo pian.

L’inglese me fasseva vegnir el latte a i zenoci
ma la prof. de lengue, la gera ‘na bela mona
e mi la despogiavo co i oci.

Gnanca ela però no la gera da manco
co’l sò sguardo la me interogava da’l banco.

Un bel zorno, ricordo che gera matina
se trovemo par caso in ascensor mi e ela
da soli, drio’ndar a far la merendina.

Tanta gera la vogia, ma la paura poca
gò strucà el boton rosso de’l STOP
ghe gò dà un baso de lengua drito in boca.

Ela ghe zè stada co’l sò far a l’inglese
però el me la gà fata pagar
co ‘na nota a fine mese.

E siccome che “baso no fà buso…
…ma fà scala par andar suzo”,
ritrovarse in ascensor ogni zorno
gera deventà de uso.

Cussì co tuto sto sù e zò invano
me sò ritrovà bocià a fine ano.

Qualchidùn dirà. “La zè bela...
ma no la sona la campanela!”

Ma ‘desso che la novela la gò bela che finia,
stà a voialtri creder se la zè
'na storia vera o la zè solo 'na bela busia.

 

Bugànze...
[Gianni Vivian]

Par nuàltri fiòi no esistèva i zòrni
de la merla, gavèvimo che l'età quando
che'l sangue sbrìssa via come fiume in brentàna,
quando che'l bòge e ribòge come late caldo butà
ne la scuèla par negàr fete de polènta brustolàda,
finìo se corèva fora a issolàr sui fossi rivestìi
de lastre de giàzzo che parèva vero...
I nostri veci:
- Sant'Agnese
el vento va su par le sièse
ma se le sièse no zé fate
el va su par le culàte!...
La ponta de'l naso canbiàva de color
come che canbiàva le rece,
prima le gera de un rosso inpissà,
po' dopo viola quarèsima,
le ponte de i dèi no le sentìvimo gnanca più
ma no'l gera proprio un dolòr, se tratàva
de un prorìto fastidiòso, ti gavèvi vògia
de supiàrghe sora co quel poco fià caldo
che ne restàva in corpo, de mètarle in scarsèla,
sòto i scàgi, drento la màgia, le bugànze no
te lassàva in pase 'lora quando che no se resistèva
più se scanpàva drento in cusìna a mètar le man
'torno el canòn de la stùa, i pìe drento la portèla
'verta de'l forno...'pèna...'pèna el tenpo de intiepidìrse
par po' dopo scanpàr fora de novo...
- 'Desso toca mi a issolàr...
Fora el vento zelà ne 'rivàva su'l muso,
el ne spenzèva a le spale, po' d'inprovìso el se fermàva
anca lu squàsi che'l volèsse zogàr, partesipàr
a la nostra pòvara e mata zògia de fiòi de la VITA...

La Marisa
[Gianni Vivian]

La gera bela la Marisa,
fursi più tipo che altro,
i so punti forti,
la so roba più bela
gera quel senato, quel pèto
sproposità che parèva che la
te volèsse sbàter in tel muso,
e la boca...carnòsa cofà 'na
pèrsega maùra che quando che
la se movèva la parèva 'na pianta
de dionèa che zé drio cazzàr,
li òci de li òmeni presenti
se inpizzàva de mile contùrbi e desideri
a qualchidun ghe vegnìva parfìn
la bava, 'n'aquèta in boca,
a farse segno, a darse gomiàe, a ridèr
soto i mustàci, a dir le sòlite monàe grasse,
a far de moto, e la Marisa se inacorzèva
de tuta quela soferènza, de quele convulsiòn,
de quele reassiòn, 'lora la se metìva a tiràr
simènto, a provocàr, no la sbassàva mai i so
oci de fronte a quele ociàe porsèe che la despogiàva
anzi la se metèva in posa, la movèva i pòmoli de
le còssie, la menàva el culo, mile mossètine,
mile moti, mile provocassaiòn...
Intanto el Tenpo passa purtropo,
el covèrse le statue e i copi de mus'cio,
el ròzega pière e palazzi, el imarzìsse el legno,
ma la Marisa no la vol rèndarse conto,
no la capìsse che el so bel pèto de 'na volta
se ga pianpianèto desgionfà, quel bel sporto
co'l canàl de Suez 'desso zé deventà pelegàte
piène de pane e mace, che ghe vol de i forti
ligàssi par tegnìrlo su, ancoràrlo,
la panza ghe s'ciòpa da tute le parti, i fianchi
zé pieni di maniglie de l'Amor e i zé fati a pero,
el so favolòso culo a mandolìn se ga strasformà
in un tamburo de la banda Dàffori,
ma ela se ne straciàva de tuti e de'l mondo,
la contìnua a portàr senpre veladìne ciuciàe e scanàe
che quando che la se cala se vede Venezia co tuti
i so canàli, a le rece la porta do s'ciòne grosse de
finto oro che fa rumor quando che la se volta de colpo...
La boca 'desso la zè pituràda de un rosso trògia,
el muso covèrto de stuchi e sbelèti,
i cavèi d'un zalo spàsemo,
ai polsi la ga bracialèti e caenìne cofà la madona
de'l petrolio che sona cofà canpanàssi,
pòvara Marisa la fa 'ncòra voltàr la zente,
ma de conpassìon, qualchidun la remèna par la boca...
- Ma no la se vede...varda in che condissiòn!
E el Tenpo contìnua a mazenàr tuto, pière d'Istria
che se negrìza, la nostra pele intagiàda senza pietà,
ma la Marisa no se rende, par 'na onbra la se làssa
palpàr el pèto, pissegàr 'na culàta da qualche vècio
sporcaciòn che no vol molàrghela, che no vol tòrse
la coròna, la dise che l'abito no fa el mònaco ma
no la capìsse, no la sa de'l vecio proverbio che dise:
- L'omo a sessantàni fa panza,
la dona invèsse fa stòmego...

 

El miràcolo inpossìbile (tradissìon popolar)
[Gianni Vivian]

Gesù caminàva longo 'na strada
quando che'l ga visto un s'ciàpo de fèmene
che sigàva e se tiràva i cavèli...
- Cossa gavìo bone done?
- Signor...Signor...agiùtane, l'arso e l'incandìo
  ga fato morìr tuto, semo senza magnàr da 'na
  setimàna...tra poco morirèmo tuti!
- Fede...Fede...done.
'lora el ga alzà li oci al Sièlo el ga benedèto un
pugno de gran e dopo el ga dito:
- Ciapè par vualtre e i vostri fiòi el ve bastarà
   fin al novo racòlto...
Più ' vanti 'n'antra dona pianzèva e sangiotàva
sora la bara de'l so omo...
- Cossa ti ga bona dona?
- Oh, Signor, me marìo zé morto...morto...
e mi so restàda sola come un can!
Fede...Fede...dona! No stà piànzer...
El Signor ga tocà la bara e el morto se ga messo
in sentòn scominziàndo a parlar...
Senpre più 'vanti el Signor ga trovà un vecèto
puzà a un muro che pianzèva cofà 'na fontàna...
- Cossa ti ga bonomo?
- Signor...Signor...go che so un pòvaro desgrassià,
  so un pensionàto de l'INPS co la minima social
  de 400 euri e no ghe la fasso più a canpàr...agiùtame
  te prego!
'Lora el Signor se ga 'vissinà a 'sto infelìsse, lo ga
abrazzà e el se ga messo a piànzer co lu...

 

 

Sansòn
[Gianni Vivian]

El gera 'na spìsima de omo
alto 'na quarta,
'na sboraùra tuto merda e velen,
senpre co la mùtria par storto,
nissùn lo gavèva mai visto rìder,
nissùn lo gavèva mai visto pagàr
'n'onbra o un cichèto, la zente lo cogionàva
lo ciamàva Sansòn:
- Sansòn che sbrèga la carta bagnàda co'l culo...
So mare ghe ripetèva tuti i santi menùti:
- Stàe ma no ti ridi mai!
- Ridarò quando che ciaparò el loto!
- Stae, tròvite 'na brava donèta, 'conpàgnite,
ti lo sa che no durarò in eterno...
- Me portarò casa 'na femena quando che
la magnarà spagna...
Senpre co la stessa veladìna istà e inverno,
el colo de la camìsa co 'na tegna tanto che ti
podèvi far 'na pignàta de fasiòli, la rabàlta de le
braghèsse senpre meza 'verta e a zenòcio,
no l'inpissàva mai nissùna stua par no spènder,
antiàni tece e pignàte no le metìva mai su
'na crosta de formàgio co la tara
un sorsègio de aqua de'l pozzo...
Quando che zé morta so mare no'l zé 'ndà
gnanca a san Micèl, un funeràl da puaretàti,
'na cassa de limòni, robe da vergognàrse...
I tosi quando che i passàva davanti a la so porta
i ghe sonàva el canpanèlo e i lo cogionàva:
- Sansòn...Sansòn che ga el balòn...
Quela matìna ghe gera un calìgo cussì fisso
da tagiàrlo co'l cortèlo quando che i lo ga portà via,
drio a 'sto funeràl no ghe gera gnanca un can
solo el pìzzegamorti e un pretìn patìo da li brodi...
Quando che li ga svodà la casa 'na lontàna nessa
ga trovà 'na cassetìna pièna de scudi d'arzento e
de fògi da mile franchi, na bubàna che no te digo,
ma zé proprio vero che el Signor ghe manda le zuche
a chi che no ga porsèi!

 

Me nono 'Mìlio...
[Gianni Vivian]

Me nono 'Mìlio gera de'l '92
nato quando che i bò coàva,
quando che i sonàva l'Avemarìa co'l còpo,
da toso el gavèva fato tuti i lavòri
i lo ciamàva "'Mìlio botèr" parchè el fassèva
boti e mastèli proprio tanto ben ma el gavèva
un bel vizièto parchè a ogni doga el 'ndàva
in ostarìa a La Pace a bagnàrse el bèco,
cussì co'l gavèva finìo el se gavèva za magnà
tuti i schei e dessoravìa el gera anca inbriàgo,
par zonta i lo ga costrèto a maridàrse a 19 ani
parchè tra le fràgole el ga lassà piena me nona Ema,
quele poche volte che'l gera sinsièr el ne contàva
de le so matitàe:
- Quando el leon de san Marco alzàva la còa
tute le altre bestie sbassàva la sua..
Venezia...Venezia
chi no la vede, no la prèzzia...
Dise i foresti: Varda Napoli e po' Mori
mi invèsse te digo varda Venezia e po' discòri!...
Go visto tanta zente ma no come i conti
de Lendinara, i nobili de Rovigo:
dièse par un figo...
Veneziani gran signori
padoàni gran dotòri
visentìni magna gati
veronesi tuti mati
udinesi castelàni co'l cognome da furlàni
trevisani pan e tripe
rovigòti baco e pipe
i cremaschi fa i cogiòni
i bressàni tàgiacantòni
ma ghe ne zé anca de pì tristi
i bergamaschi bruza cristi..
A Venezia comanda i Corneri
tanti Barbari ma pochi Giusti...
A Verona ogni mato se stagiòna
a Rovigo no me ne intrìgo
ghe zé tanta roba bona:
pan padoàn
vin visentìn
tripe trevisane
e done veneziàne...
Dime ludro, dime can
ma no stà dirme furlàn...
Chi che nàsse desfortunài
ghe piove su'l culo anca stàndo sentài...
Ricòrdate neòdo che ghe zé tre robe malzipàe:
i osèi in man ai putèi
le tose in man ai veci
e el vin in man ai todeschi...
Le done bisogna stàrghe 'tènti:
tre calìghi fa 'na piòva
tre piòve fa 'na brentàna
tre bali fa 'na putàna...
'Na tiràda co'l so sìgaro toscàn
un sospiro:
- Tuti nasse pianzèndo
nissùn mor ridèndo
tuto quelo che zé passà zé perso
tute le robe storte le drìssa la Morte...
- 'Ncòra nono...'ncòra...
- Ciàpa ànema sento franchi, crònpite calcòssa!
- Tuti ga la so ora de mona
e tuti li cani mena la còa
e tuti i mone vol dir la sua...
Tre mussi e un vian
fa quatro bestie...
Tacà a un ciòdo ma qua... 

 

 

Amori...
[Gianni Vivian]


I gera inamorài patòchi, do colònbi
che se tugàva, oci in tei oci, man ne le man,
un stomeghezzo che fassèva parfin ràbia...
- Cossa farìa senza de ti?...
- No stà dirlo gnanca par scherzo!
- Vògio morìr prima mi!
- No prima mi...'na solfa che no te digo...
Ghe gera 'na vecia storièla de'l dìndio de la
Morte che disèva che se 'sta pòvara bestia
fusse 'ndàda a finìr soto al leto da la parte
de uno o de 'st'altro questo sarìa morto
entro l'ano e par primo...
'Na sera la bestia spaurìa ga trovà la porta
in sbàcio cussì la zé entràda drento la càmara
de li sposi e la se ga portà pian pianeto verso
el leto par scòndarse soto, la sposa fassèva
finta de dormir, 'n'ocio serà e n'antro mezo 'verto
cussì co la ga visto 'sta roba la ga scominzià a
speazzàrlo a farghe de moto co la man parchè
el se 'lontanàsse...- Scìo...scìo bruta bestia!
So mario anca lu tra la vègia e el sono co'l ga visto
'sto dìndio  lo ga mandà via verso so mugèr tiràndoghe peladòni...
L'Amor fa passàr el tempo e el tenpo fa passàr l'Amor
e tuto se consuma 'lora vien fora ràdeghi, musi e musèti,
'na mosca che par un cavàlo, volèr essèr al de sora come l'ògio,
èsser come quela de'l peòcio...Lu tuto rabià cofà 'na brèspa...
- Co ti mor prima ti te farò scrìver su la tonba: Senpre freda!
 e ela che no la volèva star al de soto la ghe rispondèva acida:
- Co ti mor ti te fasso scrìver: finalmente rigido!
E zé 'rivà quel bruto zorno de'l destàco, el 'ndàva tuti i santi
zorni in simitèro, el parèva destrùto, senza più vògia de viver,
fursi el gavèva rimorsi!
- Nina mia...parchè proprio a ti...parchè...la me vita no conta
più gnente...so finìo...no vògio più viver...se ti me 'scolti
vien suzo da quela busa!
Intanto che'l disèva tute 'ste monàe, 'ste putanàe, 'na topinèra
ga scominzià proprio a rumegàr in mezo a la tonba squasi
che la so inplorassiòn fusse stàda 'scoltàda e lu co'l ga visto
'sta roba el zè saltà su come che lo gavèsse ponto un scarpiòn,
un cavriòlo deventà mato, el zé corso a zapegàr la tera che se
movèva e sighi e urla...- No...no...Nina...rechieneterna stà là!
LO GO DITO PAR BURLA!!!

 

<< INDIETRO | AVANTI >>

 

 


Imbarcazioni caratteristiche. A Venezia tutti dicono "ostregheta" e vanno tutti quanti in gondola. Invece l'imbarcazione tipica di Venezia sarebbe...

Muoversi a Venezia. Un tentativo di raccontare i vari personaggi che compongono l' allegra compagnia del trasporto pubblico a Venezia.
Tecniche per usufruire al meglio il vaporetto a Venezia

Miti culinari dei veneziani. Quali sono veramente i cibi e le bevande tipiche che il veneziano consuma quotidianamente

Come si veste il veneziano nel nuovo millennio

Cichéti & bàcari: molto ci sarebbe da scrivere. Accontentatevi di questo

Souvenir: Vivisezione di alcuni tipici oggetti ricordo che ognuno nella nostra vita ha comperato nella classica gita a Venezia

Le mete turistiche preferite dai veneziani

Soprannomi dei gondolieri

Saggezza popolare o ignoranza e basta? Metodi antichi per regolarsi senza le medicine odierne ma solo con l'esperienza dei vecchi. Tutto è tratto da un libretto del 1878 di G.B.Bernoni della Filippi editore di Venezia. Il testo è in dialetto ma io l' ho tradotto e sintetizzato in italiano

Il profumo di Venezia

Foto dall'alto

 

Sesso in piazza S. Marco. In "piazza" non si è solo colpiti dalle bellezze architettoniche ma anche dalla presenza femminile che si mette in bella mostra

Turisti: Come in altre città d'arte, il turista viene classificato ed etichettato. Breve commento e classifica antipatia

Extracomunitari: indagine comportamentale

Canzoni tipiche veneziane: le canzoni delle serenate

"Piere sbuse". Mistero e pettegolezzo di quelle pietre con il buco al centro che sporgono in certi palazzi veneziani.

Arrivo a Venezia da Mestre con l'auto

Cronaca di una mattina di mezza estate

Cronaca di una gita in barca sul Canal Grande

Cronaca di una partenza da S. Marco per Punta Sabbioni

Arrivo a Venezia dal mare

Miserie marciane

Ada

Moony Witcher

Sindaco!

RRR

 

Carnevale 2004

Carnevale 2005

Carnevale 2005. Le foto

Il volo della Carolina

Redentore

La Regata delle Befane

S. Martino

Madonna della Salute

Test del moto ondoso. Un problema di Venezia. Classifica della fretta. Commento.

Acqua alta a Venessia: uso degli stivali

Neve

Ricette venessiane tipiche. Da stampare e attaccare in cucina mentre le preparate

Il leone di S. Marco. Storia della nostra bandiera

Leoni marciani

Segnali marini

Cosa fare in laguna?

Le gobbe di Venezia

Giuochi: quelli che si facevano una volta. E di adesso...

Piccola raccolta di ninna nanne e filastrocche

Verbi

Calcio: settore giovanile

 
 
 
     
 
Dal maggio del 2000 - Venessia.com